Lista më e madhe arabe në Izrael njoftoi të enjten se do të mbështesë Gadi Eisenkotin për formimin e qeverisë së ardhshme, duke rritur gjasat që ai të zgjidhet në vend të kryeministrit Benjamin Netanyahu, i cili ka humbur mbështetjen e një partie fetare aleate. Presidenti Isaac Herzog po zhvillon konsultime me partitë politike pas zgjedhjeve të 27 tetorit, në të cilat as Netanyahu, një figurë e krahut të djathtë që ka përçarë opinionin publik dhe e ka udhëhequr Izraelin përmes tre viteve luftë, e as Eisenkot, ish-shef i ushtrisë që premton rikthimin e unitetit kombëtar, nuk siguruan vota të mjaftueshme për të krijuar një shumicë. Herzog do të vendosë vetë se kujt t'ia besojë formimin e qeverisë së re, por, sipas traditës, mandati i jepet personit që rekomandohet nga më shumë parti, që në këtë rast është Eisenkot. Listat me shumicë arabe fituan një numër të paprecedentë prej 19 mandatesh në zgjedhje, duke u shndërruar në një faktor kyç që mund të përcaktojë formimin e qeverisë, nëse opozita e Eisenkotit vendos të bashkëpunojë me to – gjë që mbetet ende e paqartë. Të dyja listat arabe njoftuan të enjten se e mbështesin Eisenkot. Ndërkohë, gjatë takimit me Herzogun, partia "Judaizmi i Bashkuar i Torës", një parti ultraortodokse, e cila e kishte mbështetur Netanyahun gjatë pesë palë zgjedhjeve të mëparshme, refuzoi ta rekomandonte sërish atë për kryeministër, ndonëse nuk u rreshtua as në krah të Eisenkotit.