Kremlini njoftoi të mërkurën se po punohet për zhvendosjen e sistemeve të mbrojtjes raketore të prodhuara në Rusi, nga Turqia në një vend tjetër; një lëvizje që mund t'i hapë rrugën Ankarasë për tu rikthyer në programin amerikan të avionëve luftarakë F-35. Turqia i bleu sistemet e mbrojtjes ajrore S-400 nga Rusia në vitin 2017, në një periudhë tensionesh mes Ankarasë dhe Uashingtonit lidhur me luftën në Siri dhe çështje të tjera. Ky veprim shkaktoi kritika nga anëtarët e tjerë të NATO-s dhe çoi në vendosjen e sanksioneve amerikane ndaj Turqisë, duke e penguar atë të merrte avionët F-35 të prodhimit amerikan për të cilët kishte paguar tashmë. Të shtunën, Ministri i Jashtëm rus, Sergei Lavrov, deklaroi se Moska mund të pranonte transferimin e sistemeve të mbrojtjes ajrore nga Turqia në një vend tjetër. "Ekziston një mundësi e tillë, me kusht që vendi ku do të zhvendosen këto sisteme S-400 të jetë i përgjegjshëm dhe të ruajë marrëdhënie miqësore me Rusinë," tha Lavrov. "Ne do të jemi të gatshëm t'i transferojmë sistemet S-400 në një vend të tillë, nëse ka një kërkesë," citohet të ketë thënë ai.