Shqipëria renditet e fundit përsa i përket Produktivitetit në punë në Ballkanin Perëndimor. Në këtë renditje kryesojnë Mali i Zi dhe Serbia. Referuar të dhënave të fundit të përpunuara nga Instituti i Vjenës për Studime Ekonomike Ndërkombëtare, Mali i Zi ka arritur një vlerë mbi 47 mijë euro për punonjës në 2024. Sipas një publikimi në revistën Monitor, ky pozicionim i favorshëm i atribuohet kryesisht strukturës së ekonomisë malazeze, e cila është e orientuar drejt shërbimeve me vlerë të lartë dhe industrive specifike. Kosova paraqitet me një performancë solide me 44,970 euro për punonjës, duke arritur në 55% të mesatares së BE-së, ndërsa Maqedonia e Veriut e ndjek me 43,810 euro në 2024. Në fund pozicionohen Bosnje-Hercegovina dhe Shqipëria. Me një prodhim prej 35,950 eurosh për një të punësuar, Bosnja dhe Hercegovina qëndron mbi Shqipërinë, e cila renditet në fund me një prodhim 34,580 euro për punonjës në 2024. Sipas vlerësimeve, Shqipëria arrin vetëm 42% të produktivitetit të BE-së, duke reflektuar varësinë e lartë nga sektorët me vlerë të shtuar të ulët, si bujqësia apo fasoneria dhe një nivel më të ulët të automatizimit të proceseve në krahasim me vendet e tjera të Rajonit.