Gjyqtari Durim Kadiu ka humbur betejën me koronavirusin, pas disa javësh i infektuar nga virusi. Lajmi është bërë i ditur përmes postimeve në facebook nga miqtë e tij. “E pabesueshme! Nuk do kemi më midis nesh njeriun fisnik, gjyqtarin dhe familjarin shembullor. Njeri i ligjit nga viti 1994, gjyqtar, kryetar i Gjykatës së Kavajës, drejtor i kabinetit të kryetarit të Gjykatës Kushtetuese dhe ndihmësgjyqtar i Gjykatës së Lartë, Durimi la kudo emrin e një njeriu të mirë dhe profesionisti të përkushtuar” shkruan një prej miqve. Një mesazh ngushëllimi ka shkruar edhe Gjykata e Lartë që thekson se ndarja e tij nga jeta ka trishtuar shumë bashkëpunëtorë të tij. “Kadiu ka ushtruar detyrën e gjyqtarit prej vitit 1994, ka drejtuar Gjykatën e Rrethit Gjyqësor Kavajë, Kabinetin e Kryetarit të Gjykatës Kushtetuese dhe vitet e fundit ka punuar si ndihmësmagjistrat në Gjykatën e Lartë. Ndarja e tij nga jeta, ka trishtuar shumë bashkëpunëtorë të tij, kolegë e miq në Gjykatën e Lartë.”, thuhet në postimin e Gjykatës në rrjetin social Facebook.