Ukraina mund të ketë goditur një tjetër luftanije ruse gjatë natës me një zyrtar që thotë se një nga fregatat më të mira të Putinit është në telashe në detin e zi. Oleksiy Gonarchenko, shef i këshillit të Odesës, që mban edhe bazën më të madhe detare të Ukrainës, e identifikoi anijen në kanalin e tij në Telegram si luftanija Admirali Makarov, një fregatë 500 milionë dollarëshe e prodhuar vetëm pesë vite më parë. Ai tha se anija kishte patur vështirësi gjatë natës dhe kishte ripostuar një lajm të një siti lokal që sugjeronte se ajo ishte qëlluar nga një raketë ukrainase afër Ishullit të Gjarprit, mbrojtësit ukrainas të të cilit, u bënë të famshëm pasi i thanë luftanijes tashmë të fundosur Moskva, të shkonte në djall, në ditën e parë të pushtimit rus. Gonarchenko shkroi në Telegram më pas: Fregata e patrullimit e marinës ruse, Admirali Makarov, është goditur. Zoti i deteve po hakmerret ndaj pushtuesve të Ukrainës. Lajme të pakonfirmuara sugjerojnë se mjete shpëtimi dhe avionë ishin nisur nga porti më i madh rus në detin e zi, ai i Sevastopolit, për të ndihmuar fregatën ndërsa të dhënat e gjurmimit tregonin edhe një dron amerikan që qarkullonte në afërsi. Nëse konfirmohet se Makarov është qëlluar, ky do të ishte një siklet tjetër i madh për Rusinë, pasi Ukraina fundosi Moskvan, luftanijen e krenarisë së flotës ruse në detin e zi, muajin e kaluar.