Fshatarët në veri lindje të kroacisë druajnë se shtëpitë e tyre mund të gëlltiten nga toka pasi thuajse 100 vrima gjigande në tokë u shfaqën në një muaj. Tani shkencëtarët po përpiqen të kuptojnë nëse toka është apo jo e qëndrueshme. Gjithcka ndodhi papritur dhe pa paralajmërim. Atje ku duhej të mbinin patate, në kopshtin e madh të Nikola Borojevicit, tani ka një vrimë të madhe. 30 metra e gjerë dhe 15 metra e thellë, ajo është mbushur shpejt me ujë. Dhe kjo gropë nuk është e vetmja. Brenda vetëm pak javësh, dhjetëra gropa të tilla u hapën në disa fshatra në veri lindje të kroacisë. E kjo ndodhi pasi një tërmet me manjitudë 6.4 goditi zonën rreth qytezës së Petrinjës. Ai ishte tërmeti më i fortë që ka goditur kroacinë në më shumë se katër dekada, duke i marrë jetën shtatë personave e duke shkatërruar mijëra shtëpi. Ndërsa rrëshqitjet e tokës dhe vrimat e stërmëdha dihet se shkaktohen nga tërmetet, bashkë me fenomene të tjera, kur terreni i fortë nis të sillet si një terren i paqëndrueshëm, me shumë vrima që shfaqen papritur, ekspertët mbeten gojëhapur. Një muaj pas tërmetit, pati thuajse 100 vrima që u përhapën në 10 km katror, me vrima të reja që hapeshin cdo javë. Disa prej tyre madje janë hapur vetëm pak metra larg nga shtëpitë e banorëve, duke i frikësuar jo pak ata.