Pandemia e koronavirusit i dha një goditje të fortë ekonomisë thuajse në të gjithë botën. Edhe ekonomia shqiptare pati ndikimin negativ, por ka një dritë jeshile, e cila është vënë në dukje përmes një raporti të Fondit Monetar Ndërkombëtar. FMN pasqyron një bilanc më pozitiv nga çfarë ishte parashikuar më pare lidhur më rënien ekonomike. Sipas Fondit Monetar Ndërkombëtar, recesioni për vitin 2020 ka qenë -3.5 për qind, një shifër kjo shumë pranë vlerësimit që bëri Instituti i Statistikave pak ditë më parë, sipas të cilit recesioni i viti 2020 ishte thuajse në të njëjtin nivel. Shqipëria renditet si vendi me rënien më të ulët ekonomike në rajon pas Serbisë, recesioni i të cilës ka qenë vetëm -1 për qind. Shteti ballkanik më i goditur nga pandemia është Mali i Zi, por edhe Kosova, Bosnjë Hercegovina dhe Maqedonia, të cilat kanë pasur një rënie të konsiderueshme ekonomike. Recesioni i 2020 u krijua si pasojë e pamundësisë së furnizimit për shkak të masave kufizuese, që u futën në rendin e ditës së cdo shteti për të parandaluar koronavirusin.