Një grua në Turqi pretendon se ka festuar ditëlindjen e saj të 119 të dielën, cka do ta bënte atë njeriun më të moshuar në botë. Mediat turke raportuan se Seker Arslan ka festuar ditëlindjen e rrethuar nga familja e saj në qytetin verior Amasya. Sipas të dhënave në patentën e saj, gruaja ka lindur më 27 qershor 1902, cka do të thotë se ajo është 119 vjec. Sidoqoftë, duket se familja e saj nuk është fort e mirë në matematikë, pasi në fotot e gruas shihet ajo para një torte në të cilën është vendosur numri 120...Arslan ka gjashtë fëmijë, 12 nipa dhe duket se ka trashëguar jetëgjatësinë e saj nga e ëma, që thuhet se ka jetuar për 110 vjet. Vajza e saj, ia atribuon jetëgjatësinë e të ëmës, konsumimit të ushqimeve natyrale, si gjalpi, mjalti dhe djathi. “Gjalpi, mjalti dhe djathi kanë qenë gjithnjë në tryezën e saj. Ajo e zinte gjithnjë kosin vetë dhe hante një vezë të zier në mëngjes”, tregon e bia duke shtuar se nëse e moshuara nuk do të ishte prekur nga Alzheimeri, do të kishte patur shëndet të plotë. E vetmja keqardhje për 119 vjecaren, gjithnjë sipas të bijës, është fakti se nuk ka ende asnjë stërnip apo stërmbesë për ta shtuar në trungun e saj familjar. Banorët lokalë duan që ditëlindja e saj të njihet në mënyrë që ajo të marrë titullin e personit më të moshuar në jetë, duke ia rrëmbyer atë japonezes Kane Tanaka që ka lindur gjashtë muaj pas Arslan, më 2 janar 1903. Personi më i vjetër i regjistruar ndonjëherë ka qenë francezja Zhan Kalment, që jetoi nga 21 shkurti 1875 deri më 4 gusht 1997, në moshën 122 vjecare.