Rritje e turizmit nuk ka nxitur prodhimin bujqësor në vend, pasi nevojat shtesë për të ushqyer vizitorët po mbulohen nga importi. Gjatë muajit qershor, importet e prodhimeve ushqimore u rritën më rreth 18%. Nga 23 grupet e importit të ushqimeve, kanë shënuar rritje të fortë grupet me objektiv turizmin. P.sh. sasitë e peshkut të importuar në qershor 2024 ishin 24% më të larta se në qershorin e vitit 2023. Gjithashtu, produktet e bulmetit shënuan rritje të lartë me 19%.Drithërat kanë shënuar rritje të lartë me 53%. Po ashtu, produktet e ëmbëlsirave gjithashtu kanë shënuar rritje, si një nga përbërësit kryesorë të pjatave në restorante. Shqipëria është një prodhues i madh në rajon i zarzavateve nga serat, por importet në këtë grup shënuan rritje vjetore me 43 % në 6-mujor, ndërsa importet e frutave u rriten me 31%. Turistët kanë ndikuar ndjeshëm në rritjen e konsumit në vend dhe në tregtinë me pakicë. Nga ana tjetër eksportet e prodhimeve bujqësore në sasi kanë ardhur në rritje, por prodhimi bujqësor në tërësi është në rënie. Sakaq, plakja e popullsisë në fshatra ka sjellë dhe uljen e numrit të bagëtive, për pasojë dhe prodhimin e bulmetit.