Rajoni i Evropës ka shënuar rritjen më të madhe të importeve të armëve, me një rritje prej 19 për qind në periudhën 2017-2021, ndërkaq Shtetet e Bashkuara kanë eksportuar më shumë armë sesa Rusia. Në raportin e publikuar më 14 mars nga Instituti Ndërkombëtar i Paqes (SIPRI), me seli në Stokholm, thuhet se krahasuar me periudhën 2012-2016, kjo rritje e importeve të armëve në Evropë përbën 13 për qind të të gjitha trasfereve globale të armëve. Sipas raporti, importuesit kryesorë të armëve në Evropë janë Mbretëria e Bashkuar, Norvegjia dhe Holanda, ndërkaq shtetet e tjera evropiane po ashtu pritet të rrisin importin e armëve në dekadën e ardhshme, pasi veçse kanë marrëveshje për blerjen e tyre, veçmas të avionëve luftarakë nga Shtetet e Bashkuara. SIPRI tha se pavarësisht luftës që po vazhdon në Ukrainë, importet e armëve të këtij shteti në periudhën 2017-2021 ishin mjaft të kufizuara. “Përkeqësimi i raporteve midis shumicës së shteteve evropiane dhe Rusisë është një shtysë e rëndësishme e rritjes së importeve të armëve në Evropë, veçanërisht për shtetet që nuk mund të përmbushin kërkesat e tyre përmes prodhimit të armëve”, tha Pieter D. Ëezeman, hulumtues i lartë në SIPRI. Sipas tij, “transferimi i armëve po ashtu ka luajtur një rol të rëndësishëm në raportet transatlantike të sigurisë”. Nga shtetet e rajonit të Ballkanit Perëndimor, Serbia përmendet në raport si pranuese e dërgesave të armëve nga Bjellorusia. Bjellorusia ndërkaq radhitet në vendin e 20 të shteteve që eksportojnë më së shumti armë.