Top News-Erdogan thotë ‘jo’: Strehojnë terroristë/Nuk pranon kërkesën e Suedisë e Finlandës për NATO

Presidenti turk Rexhep Taip Erdogan tha se delegacionet suedeze dhe finlandeze nuk duhet ta marrin mundimin të shkojnë në Ankara për ta bindur atë që të miratojë kërkesën e tyre për anëtarësim në NATO. Qeveria e Suedisë ka vendosur zyrtarisht të kërkojë anëtarësim në NATO, tha të hënën kryeministrja Magdalena Andersson, një ditë pasi presidenti finlandez Sauli Niinisto konfirmoi se edhe Helsinki do të bëjë të njëjtën gjë. Turqia i befasoi aleatët e saj të NATO-s javën e kaluar kur tha se nuk do t'i shihte kërkesat e tyre për anëtarësim në dritë pozitive, duke përmendur si argument kryesor faktin që ata u japin strehim anëtarëve të grupeve që Ankaraja i konsideron si terroristë. Në një konferencë shtypi, Erdogan tha se Turqia nuk do të miratojë aplikimet e tyre për t'u anëtarësuar në NATO, duke e quajtur Suedinë një "inkubator" për organizatat terroriste dhe duke shtuar se ata kanë terroristë në parlamentin e tyre.