Ushtria ruse tha se do të hapë një korridor humanitar për evakuimin e civilëve nga uzina e rrethuar e celikut, Azovstal, në qytetin e Mariupolit. Korridori, sipas ministrisë ruse të mbrojtjes, do të hapet nga ora 2 e pasdites së 25 prillit dhe të gjithë civilët do të mund të largohen nga zona e Azovstalit pa u shndërruar në shënjestra. Impianti i stërmadh, ka mbetur bastioni i fundit i rezistencës ukrainase në qytet dhe zyrtarët ukrainas thonë se deri në 1 mijë civilë janë strehuar në tunelet e nëndheshme të tij përvec rreth 2 mijë luftëtarëve. Ata i kanë kërkuar në vazhdimësi rusisë për të mundësuar evakuimin e tyre por përpjekjet e mëparshme kanë dështuar. Njoftimi i Moskës vjen një ditë pasi presidenti ukrainas, Volodimir Zelenski, tha se i kishte kërkuar presidentit turk, Recep Tayyip Erdogan, të ndërmjetësonte evakuimin e civilëve nga Mariupoli. Zelenski tha se të dy ata kishin folur para se presidenti turk të bisedonte me presidentin rus, vladimir Putin. Më herët ndërkohë është bërë e ditur se në një mision të dëshpëruar pajtimi do të udhëtojë drejt Moskës dhe Kievit edhe shefi i Kombeve të Bashkuara, Antonio Guterres, por edhe ky i fundit, duket se do të ndalet në shtëpinë e Erdogan para se të fluturojë drejt Moskës, të martën.