Kuba ka evakuuar 180,000 njerëz nga frika se stuhia tropikale Elsa mund të shkaktojë përmbytje të mëdha pasi goditi disa ishuj të Karaibeve, duke shkaktuar të paktën tre viktima. Shumica e të evakuuarve u strehuan te të afërmit, ndërsa rreth 23,000 njerëz u strehuan në strukturat qeveritare. Qeveria kubane ka bërë thirrje që të gjithë të mobilizohen për mbrojtjen e të korrave të kallamsheqerit e kakaos nga stuhia. Me qindra qytetarë që jetojnë në viset malore janë strehuar nëpër shpella, në përgatitje për situatën. Objektivi tjetër i stuhisë pritet të jetë Florida, ku Guvernatori Ron DeSantis shpalli gjendjen e jashtëzakonshme në 15 qarqe, përfshirë Miami-Dade ku një ndërtesë shumëkatëshe u shemb muajin e kaluar. Zyrtarët atje shpresojnë që mos t’u duhet të ndërpresin operacionin e kërkim-shpëtimit në zonën e tragjedisë. Të dielën në mëngjes, Elsa ishte rreth 50 km në veri të qytetit Kingston të Xhamajkës, dhe po shkonte në veri-perëndim me 13 km në orë. Ajo kishte erëra të qëndrueshme maksimale prej rreth 60 km në orë, sipas Qendrës Kombëtare të Uraganeve të SH.B.A.-së në Miami.