Ministria e Shëndetësisë e Serbisë njoftoi të enjten se ka konfirmuar dy raste me variantin Delta të koronavirusit. Të dy pacientët janë në gjendje të qëndrueshme, thuhet në njoftim. Po ashtu bëhet e ditur se ata kanë qëndruar jashtë shtetit dhe se nuk janë të vaksinuar kundër koronavirusit. Sipas Organizatës Botërore të Shëndetësisë, varianti Delta, i identifikuar për herë të parë në Indi, është më ngjitës. Nga vendet e Ballkanit Perëndimor, raste me këtë variant ka konfirmuar Kroacia më 28 qershor dhe pastaj Kosova më 29 qershor. Qendra Evropiane për Parandalimin dhe Kontrollin e Sëmundjeve ka paralajmëruar se varianti Delta mund të përbëjë 90 për qind të rasteve të reja në Bashkimin Evropian deri në fund të gushtit. Simptoma të këtij varianti janë: dhimbja e kokës, dhimbja e fytit dhe rrjedhja nga hunda. Pamjet: AFP