Ministri i Mbrojtjes i Ukrainës, Oleksiy Reznikov deklaroi se forcat ruse kanë “përparuar në disa drejtime”, ndërsa shtoi se mbrojtësit ukrainas po kundërshtojnë dhe dëbojnë pushtuesit. Ai u shpreh se rusët kanë avancuar në disa drejtime mirëpo kanë nën kontroll vetëm zona të vogla. “Natyrisht, armiku ka avancuar në disa drejtime, megjithatë, ai kontrollon vetëm zona të vogla. Mbrojtësit tanë po kundërshtojnë ashpër dhe po dëbojnë pushtuesit,” tha ai duke shtuar se për shkak të “ngadalësimit të ritmit të sulmit dhe rezistencës së ukrainasve, Rusia po ndryshon taktika”. “Agresori përdor potencialin e tij ajror dhe raketor në mënyrë gjithëpërfshirëse dhe aktive. Të gjitha llojet e aviacionit po bombardojnë qytetet tona, qytezat dhe infrastrukturën civile, duke përfshirë infrastrukturën kritike dhe infrastrukturën e rrezikshme, mes tyre centralet bërthamore dhe hidrocentrale”, tha ai. Reznikov tha se forcat ruse po sulmojnë ndërtesa banimi, shkolla, kopshte dhe spitale. “Armiku po shkatërron kishat dhe katedralet. Ai po bombardon stacionet hekurudhore me mijëra gra dhe fëmijë që evakuohen. Këto janë taktikat e çakejve të frikësuar. Kam besim se armiku do të paguajë për çdo jetë dhe për çdo lot”, pohoi zyrtari.