Kur dukej se dimri kishte kaluar dhe po u gëzoheshm rrezeve të diellit, moti ka vendosur të bëjë një tjetër shaka në këto ditë të para të muajit prill. Kështu këtë të martë janë rikthyer rreshjet e dëborës në disa zona malore, kryesisht në veri-lindje e lindje të vendit, teksa temperaturat kanë pësuar një rënie të ndjeshme. Sinoptikanët thonë se në dy ditët e ardhshme, temperaturat më të ulëta në zonat malore pritet të shkojnë deri në -2 gradë dhe deri në 1 apo 0 gradë në pjesën tjetër të vendit. Rritja graduale e temperaturave pritet të ndodhë vetëm në fundjavën e ardhshme, ndërkohë që deri atëherë do të na duhet të mësohemi sërish me një atmosferë dimri. Vlen të theksohet se kjo rënie e befasishme e temperaturave, shoqëruar edhe nga reshjet e dëborës, ka dëmtuar jo pak frutikulturën në vend, teksa kryesisht në fshatrat e Korçës, pemtaria ka vuajtur më së shumti “tekat” e motit.