Të paktën katër njerëz kanë vdekur dhe më shumë se 300 të tjerë janë plagosur, pas shembjes së një tribune gjatë një gare me dema në qendër të Kolumbisë. Në pamjet video është parë që tribuna prej druri, me tri nivele, dhe e mbushur me spektatorë, që është shembur në stadiumin El Espinal. Një dem është parë duke lëvizur teksa njerëzit vraponin në panik. Ngjarja tradicionale, e njohur në Kolumbi si “correlaja” përfshin anëtarë të publikut, të cilët duhet të hyjnë në ring për të tërhequr vëmendjen e demave. Në mesin e viktimave janë dy gra, një burrë dhe një fëmijë, ka thënë guvernato1ri i Tolimas, Jose Ricardo Orozco. Autoritetet shëndetësore rajonale kanë thënë se 322 njerëz janë duke u trajtuar në spital, ndërsa katër prej tyre janë në kujdes intensiv. Eventi i së dielës ishte pjesë e festivalit shumë të njohur San Pedro. Presidenti në largim Ivan Duque, ka thënë se do të nisin hetimet për rastin, ndërsa presidenti i zgjedhur, Gustav Petro, u ka bërë thirrje autoriteteve lokale që të ndalojnë organizime të tilla. “U kërkoj kryetarëve që të mos lejojnë më shumë organizime që përfshijnë vdekjen e njerëzve apo kafshëve”, tha ai.