Organizata Botërore e Shëndetësisë u ka kërkuar vendeve që të tregojnë kujdes të jashtëzakonshëm, ndërsa vendosin që t'i japin fund kufizimeve dhe të hapin ekonomitë e tyre në mënyrë që "të mos humbasin përfitimet që kanë arritur". Doktori Michael Ryan tha se ideja për të lejuar më shumë njerëz të infektohen tashmë është provuar të jetë "marrëzi epidemiologjike".OBSH gjithashtu u bëri thirrje vendeve që po konsiderojnë të vaksinojnë fëmijët 12 deri në 15 vjeç, që në vend të kësaj, t'i dhurojnë ato doza në strukturën Covax për të ndihmuar vendet e varfra. Programi deri tani ka dërguar mbi 95 milionë vaksina për 134 pjesëmarrës. Vetëm 1% e njerëzve në vendet me të ardhura të ulëta u është dhënë të paktën një dozë. Të mërkurën ndërkohë bota arriti "momentin tragjik" të shënimit të katër milionë viktimave nga COVID-19 ndërkohë që OBSH thotë se shifra e vërtetë mund të jetë edhe më e lartë. Shefi i OBSH-së, tha se shifra prej katër milionësh u shënua më shumë se 18 muaj që kur ndodhi shpërthimi i parë i koronavirusit, në dhjetor të vitit 2019, në Kinë. "Bota është në një pikë të rrezikshme të kësaj pandemie", tha ai duke përmendur më pas faktin se disa vende, për shkak të një shkalle të lartë të imunizimit, po i heqin kufizimet sikur pandemia të kishte mbaruar. Sidoqoftë, ai tërhoqi vëmendjen se në të gjithë botën po regjistrohet rritje e mprehtë e rasteve të reja dhe shtrimeve në spital, për shkak të varianteve të reja të koronavirusit që po përhapen me shpejtësi, por edhe për shkak të një “pabarazie në aksesin në vaksina kundër COVID-19”.