Mbretëria e Bashkuar thotë se ka shtuar disa miliarderë rusë të profilit të lartë në listën e saj të sanksioneve, duke përfshirë Roman Abramovichin, pronarin miliarder të klubit të futbollit në Premier League, Chelsea, dhe industrialistin Oleg Deripaska, i cili ka bërë thirrje për t'i dhënë fund luftës që Moska filloi me Ukrainë muajin e kaluar. Qeveria britanike tha në një deklaratë se lista e re përfshin gjithashtu shefin ekzekutiv të Rosneft-it (kompania e naftës) Igor Sechin, kryetarin e Bankës VTB, Andrey Kostin, shefin e Gazprom-it Aleksei Miller, pronarin e firmës së tubacionit Transeft, Nikolai Tokarev, dhe kryetarin e Bank Rossiya, Dmitry Lebedev. Lëvizja, e ndërmarrë si përgjigje kundër pushtimit të paprovokuar të Ukrainës nga Rusia, ngrin asetet e Mbretërisë së Bashkuar dhe vendos një ndalim udhëtimi për ata që janë në listë, që do të thotë se atyre u ndalohet të vizitojnë Mbretërinë e Bashkuar dhe ndalohen nga transaksionet me individë dhe biznese të Mbretërisë së Bashkuar. Që nga nisja e pushtimit, më 24 shkurt, shumë vende perëndimore kanë vendosur sanksione mbi Rusinë dhe zyrtarët e miliarderët rusë, të cilët kanë lidhje të ngushta me Vladimir Putinin.