Ish-presidenti i Shteteve të Bashkuara të Amerikës, Donald Trump ka folur sërish në lidhje me atë që po ndodh në Ukrainë pas pushtimit rus. Mediat e huaja shkruajnë se kohët e fundit, në një bisedë me mikun e tij, Trump ka theksuar se gjatë presidencës së tij në krye të Amerikës, Putin nuk kishte asnjë shans që të sulmonte Ukrainën. Në një bisedë me një lojtar golfi, John Daly, Trump theksoi se ishte marrë vesh shumë mirë me Putinin kur ishte president dhe se Rusia nuk e sulmoi në atë kohë Ukrainën, pasi ai e kërcënoi se do t’i hidhte bombën bërthamore në Moskë. “Të gjithë sot thonë se Rusia është një fuqi bërthamore, sikur të kenë frikë prej saj. Ti e di. Ai ishte një miku im dhe unë ja kalova mirë me të. I thashë, Vladimir nëse e bën këtë gjë ne do të godasim Moskën. Dhe ai më besoi sadopak 5%, 10% aq duhet”, është shprehur Trump në bisedën me mikun e tij. Ndër të tjera Trump deklaron se as presidenti kinez nuk ngatërrohej me të pasi dhe atij i kishte thënë të njëjtën gjë. Trump gjithashtu përsëriti pretendimin e tij se Putini nuk e pushtoi Ukrainën gjatë kohës që ishte president sepse "ai e dinte se nuk do të mund ta bënte një gjë të tillë".