Sekretari amerikan i shtetit, Antony Blinken i dërgoi Rusisë një paralajmërim të qartë për “kosto dhe pasoja” të aktiviteteve të saj në dëm të interesave amerikane. Blinken i bëri komentet në një intervistë me rrjetin televiziv CNN “Ne do të marrim masat e nevojshme për të mbrojtur interesat tona,” në momentin kur SHBA ta shohin të përshtatshme, u shpreh kryediplomati amerikan në intervistën që shte regjistruar disa ditë më parë, në kohën kur ai përmbyllte në Bruksel bisedimet me homologët e tij në NATO. Mes aleatëve perëndimorë, tha Blinken “ka një angazhim të përbashkët” se duhet të tregohen “sy-hapur e mendje kthjellët” lidhur me veprimet e Moskës dhe ta bëjnë përgjegjës Kremlinin. Sekretari i shtetit u shpreh se zyrtarët janë në vazhdën e punës duke analizuar mundësinë e sanksioneve apo masave të tjera nga Ëashingtoni kundër Moskës dhe po vijojnë konsultimet me vendet e NATO-s. “Ne jemi më të fortë kur veprojmë në bashkërendim,” u shpreh ai. Megjithëse SHBA dhe Rusia rënë dakord me shpejtësi për të zgjatur një traktat për kontrollin e armëve që do të skadonte pak pas ardhjes në Shtëpinë e Bardhë të Presidentit Biden, Uashingtoni po fajëson Rusinë për veprime të tjera, përfshirë ofertën e shpërblimeve për ata që kryejnë atentate ndaj trupave amerikane në Afganistan, përzierje në zgjedhjet e 2020 dhe nderhyrjen në sistemet kompiuterike amerikane.