Top News – Berisha i përgjigjet Yuri Kimit: Po mbron aferat e saj, t’i hetohen pronat në Shqipëri

Ish-kryeministri, Sali Berisha reagoi menjëherë ndaj ambasadores së Juri Kim, që më herët e kishte cilësuar një “zjarrvënës që premton të fikë zjarret” në një intervistë për të Zërin e Amerikës. Duke e konsideruar deklaratën e Kim, si një shërbim të fundit për Edi Ramën, Berisha bëri thirrje që të hetohen aferat dhe pronat e ambasadores së Shteteve të Bashkuara të Amerikës në vendin tonë. “Guvernatorja Yuri Kim në përpjekje për një shërbim të fundit Edi Ramës, foli sot njëlloj sikur të fliste McGonigal me fustan. Por me dekleratën e saj për zjarre dhe zjarrëvënës në të vërtetë ajo përpiqet të fsheh aferat e veta korruptive të denoncuara publikisht, por edhe afera të tjera. Ftoj inspektorin e përgjithshëm të Departamentit të Shtetit, FBI dhe Kongresin e SHBA të hetojë aferat korruptive të guvernatores Kim përfshirë këtu pronat e saj në Shqipëri”, shkroi ndër të tjera Berisha. Ambasadorja Juri Kim deklaroi më herët për Zërin e Amerikës se Berisha është një personazh i përcaktuar për korrupsion domethënës nga ShBA-të dhe duket paradoksale se si del ende e premton të luftojë korrupsionin.