Ish ministri Ilir Beqaj ka bërë rekurs në Gjykatën e Lartë për masën e sigurisë “arrest në burg” të vendosur ndaj tij lidhur me hetimet për dosjen “Saspac”. Përmes avokatit të tij Ermal Yzeiraj, ai ka kundërshtuar masën që iu caktua nga gjykata e posaçme. Ish-ministri u arrestua në katër korrik të këtij viti me urdhër të prokurores Elida Kaçkini, e cila kreu hetimet për abuzimin e kryer nga ish-ministri me agjencinë e menaxhimit të fondeve të Bashkimit Europian. Kjo çështje, përvec Beqajt la në qeli Ermal Kurtulajn dhe Alfred Nikollaj. Ndërsa për Elton Martini, GJKKO caktoi masën “arrest në shtëpi”. Ndërsa Bledar Leka, Gazmend Haxhia dhe Bjona Ziaj kanë masën më të lehtë atë të “detyrim paraqitje”. Prokuroria e Posaçme ka sekuestruar gjithashtu llogari me vlerë rreth 21 milionë lekë të reja të ish-ministrit Ilir Beqaj dhe 5 bashkëpunëtorëve të tij, të cilët janë në hetim për abuzimet me fondet e BE në SASPAC.