Vendet e Bashkimit evropian që bllokojnë ndalimin e importit të naftës ruse, u denoncuan nga ukraina si bashkëpunëtorë në krime lufte. Komisioni evropian, një ditë më parë, publikoi planet për të ndëshkuar Moskën duke ndalur importet e naftës brenda gjashtë muajve të ardhshëm. Por një numër vendesh anëtare, mes të cilëve Hungaria dhe Sllovakia, kanë kërkuar përjashtime duke thënë se nuk kanë kohë mjaftueshëm që të adaptohen me këtë masë. SHBA dhe Britania e Madhe kanë vendosur që më herët të ndalojnë importin e naftës ruse. Por, për ministrin e jashtëm ukrainas, Dmytro Kuleba, nëse do të ketë ndonjë vend në evropë që do të vazhdojë të kundërshtojë embargon ndaj naftës ruse, do të ketë arsye për të thënë se ai vend është bashkëpunëtor në krimet e kryera nga rusia në territorin e Ukrainës.