Një tragjedi ka tronditur Spanjën, pasi një vajzë vetëm dy vjeçe humbi jetën pasi u la për disa orë brenda makinës së babait të saj, mes temperaturave ekstreme që kanë përfshirë vendin. Ngjarja ndodhi në qytetin Brión, në rajonin e Galicias. Sipas mediave spanjolle, babai i vogëlushes dyshohet se harroi ta çonte në çerdhe pasi u shpërqendrua gjatë rrugës për në punë. Ai kishte lënë fillimisht fëmijën tjetër në shkollë dhe më pas ishte larguar, pa kuptuar se vajza kishte mbetur në sediljen e pasme të automjetit. Alarmi u dha disa orë më vonë, kur nëna shkoi për ta marrë vajzën në çerdhe dhe u informua se ajo nuk kishte mbërritur kurrë. Prindërit njoftuan menjëherë autoritetet, por vogwlushja nuk arriti të mbijetonte, pasi kishte pësuar arrest kardiak si pasojë e temperaturave tw larta. Autoritetet spanjolle kanë nisur hetimet për të zbardhur plotësisht rrethanat e ngjarjes, ndërsa autoritetet vendase shpallws dy ditë zie. Tragjedia vjen në një moment kur Spanja po përballet me temperatura shumë të larta, me meteorologët që paralajmërojnë se valët e të nxehtit po bëhen gjithnjë e më ekstreme për shkak të ndryshimeve klimatike.