Ekzekutohet një 41 vjecar në Elbasan, ndërsa ka shpëtuar mrekullisht bashkëshortja e tij. Atentati mafioz ndodhi ndodhi në lagjen “Skënderbej”. Burimet policore thonë se viktima është Everest Çaka, ndërsa e plagosur bashkëshortja e tij Silvana. Forca të shumta policie rrethuan vendin e ngjarjes dhe burimet thanë se në sallën operative të Drejtorisë Vendore të Policisë ka mbërritur një telefonatë për të shtëna me armë zjarri në lagjen “Skënderbe”, që ka njoftuar për ngjarjen në afërsi të një kompleksi në autostradë. Teksa po qarkullonte me makinë bashkë me gruan e tij, mjetit tip “Opel” i është prerë rruga dhe ndaj tij është qëlluar me breshëri me armë zjarri. Por, pas ngjarjes, janë mësuar të tjera detaje lidhur me ekzekutimin e Everest Çakës, i cili u qëllua për vdekje. Mësohet se viktima është djali i tezes se Arjan Spahiut, i cili është ekzekutuar në nëntor në Belgjikë. Ardit (Arjan) Spahiu është 38- vjeçari që ka lidhje familjare (kunat) me Erion Alibejn, i cili ndodhet pas hekurave për organizimin e disa vrasjeve. Everest Çaka alias Ibrahim Çaka nuk ishte person me precedentë të theksuar kriminalë, ndonëse Policia e pyetur për këtë person nuk bëri të ditur detaje, por lidhur me pistat e vrasjes për ta është hakmarrja dhe prishja e pazareve të drogës. Ndërkohë, pas minuta pas vrasjes, në Elbasan ka mbërritur vetë Drejtori i Përgjithshëm i Policisë së Shtetit, Ardi Veliu. Policia ka blinduar hyrjet dhe daljet e qytetit, ndërsa nuk ka asnjë të dhënë për autorët e mundshëm. Gjithashtu, një njësi e forcave të Ndërhyrjes së Shpejtë është nisur drejt Elbasanit, ku ka nisur një operacion dhe janë shoqëruar disa persona.