Më shumë se 21 mijë gjoba janë vënë brenda javës nga Policia Rrugore. Në bilancin e publikuar mësohet se janë arrestuar 40 shoferë, për drejtim mjeti në gjendje të dehur dhe për drejtim të mjetit pa leje drejtimi. Sakaq janë pezulluar 156 leje drejtimi për shpejtësi mbi normat e lejuara, për drejtim të mjetit në efektin e alkoolit në gjendje të dehur dhe për qarkullim në sens të kundërt. Kryesisht masat administrative ndëshkuese janë vënë për shpejtësi tej normave të lejuara, për përdorim të celularit gjatë drejtimit të mjetit, për mospërdorim të rripit të sigurimit, për parakalime të gabuara, për mosvendosje të kaskës mbrojtëse, për manovra të rrezikshme në rrugë dhe për shkelje të tjera të qarkullimit rrugor. Nisur nga fluksi shumë i lartë i automjeteve drejt zonave bregdetare dhe turistike, janë shtuar patrullat e lëvizshme, duke përdorur mjete inteligjente, radarë automatikë dhe dronë të cilësisë së lartë. Policia Rrugore apelon për të gjithë drejtuesit e automjeteve dhe motomjeteve, për zbatim të rregullave të qarkullimit rrugor, për përdorim të rrugëve alternative, për qëndrim në radhë kur ka ngadalësim të lëvizjes së automjeteve në raste fluksi, t’u japin përparësi këmbësorëve dhe të mos kryejnë parakalime të gabuara apo manovra të rrezikshme në qendrat urbane dhe akset nacionale.