Ministrat e Brendshëm të BE janë të shqetësuar, se kontrabanda e armëve në Europë do të mbetet një problem për shumë vite, sepse lufta në Ukrainë ka sjellë një fluks të madh armësh ilegale në treg. Në takimin e parë të ministrave të Brendshëm të BE nën presidencën ceke, lufta në ukrainë ishte në qendër dhe nuk u fol vetëm për refugjatët, por edhe për kriminalitetin ndërkufitar. Në krye të listës së rreziqeve potenciale qëndron kontrabanda e njerëzve por jo më pak e rrezikshme është edhe tregtia e armëve, thotë drejtoresha e përgjithshme e Agjencisë së BE për Mbrojtjen e Kufijve, Frontex, Aija Kalnaja. "Mendoj se ky është një rrezik shumë real. Prandaj jemi prezent në kufirin mes Moldavisë dhe Ukrainës. Ne besojmë se aty mbërrijnë armët e kontrabanduara. Jemi të përgatitur për ta ndaluar këtë."