Autoritetet italiane të antimafias kanë sekuestruar mbi 200 milionë euro pasuri në një operacion të gjerë kundër rrjetit financiar të ish-bosit të Cosa Nostra-s, Matteo Messina Denaro. Sipas hetuesve, bëhet fjalë për para dhe asete të krijuara nga dekada trafik droge dhe aktivitete kriminale të lidhura me mafian siciliane. Operacioni u zhvillua në disa vende, përfshirë Italinë, Spanjën, Zvicrën dhe Ishujt Kajman. Policia bastisi vila luksoze, kompani dhe prona të tjera, ndërsa në aksion morën pjesë mbi 150 oficerë, dronë dhe ekspertë të teknologjisë për të gjurmuar edhe kriptovalutat dhe fondet e fshehura. Tre persona janë arrestuar dhe tetë kompani janë identifikuar si të lidhura me pastrimin e parave të mafias. Hetimi nisi pas një sinjalizimi nga Andorra për një grua italiane me burime të mëdha financiare, e cila rezultoi e lidhur me një trafikant droge pranë rrjetit të Messina Denaro-s.