Pas kerkeses së SPAK, Gjykata e Posaçme kundër Krimit dhe Korrupsionit ka vendosur të lërë në “arrest me burg” nëntë personat e prangosur gjatë operacionit “Kompleksi”, gjatë të cilit u zbuluan 18 baza me armë luftarake e u sekuestrua një arsenal i vërtete armatimesh, ku përfshihen armë të tipit kallashnikovë, snajpera anti-tanke, silenciatorë e madje edhe radio policie e ushtrie. Në mesin e të ndaluarve janë Klodian Kulla, Flori Abazi, Paris Prenga e Bledi Deda. Operacioni i tre diteve me parë ishte bashkëpunim i forcave Renea dhe FNSH-së. Në 18 bazat e shkatërruara bëhej modifikimi, magazimi dhe shitja e armëve luftarake. Efektivët sekuestruan edhe optikë termikë për snajper, si dhe 7 automjete, 2 prej të cilave të blinduara. Disa prej personave të kapur me armatim të rëndë në Tiranë besohet të kenë qenë pjesemarrës ne 3 ngjarje kriminale të ndodhura gjatë periudhës 2017-2019 në Tiranë. Si të përfshirë në këtë grup kriminal dyshohen edhe Ermond Jamaku dhe Enver Jamaku, të cilët u prangosën në fund të muajit shkurt, nën akuzën për vrasje me eksploziv të Gjon Menës në Kamëz.