Kërkimi për dhjetëra pjesëtarë të ekuipazhit të anijes e cila u nda në dysh dhe u mbyt pasi u gjend në qendër të tajfunit Chaba, vazhdojnë në Hong Kong edhe pse shpresat duket se po zbehen. Zyrtarët thanë se anija u mbyt rreth 300 km në jugperëndim të një ishulli. Kërkesa për ndihmë ishte marrë në orën 7.25 minuta të mëngjesit të së shtunës dhe ekuipazhi e kishte braktisur anijen pasi ajo ishte dëmtuar rëndë në detin e kinës së jugut. Pamje dramatike të operacionit të shpëtimit, tregonin një anëtar të ekuipazhit që tërhiqej me litar në një helikopter, nga anija që po mbytej. Tre pjesëtarë të ekuipazhit u shpëtuan por fati i 27 të tjerëve që ndodheshin në bord, mbetet i panjohur. Kushtet e motit kanë qenë të vështira cka edhe ka penguar operacionet e kërkim shpëtimit. Katër helikopterë dhe mjete të tjera janë dërguar në zonë për kërkime. Stuhia shkaktoi shumë probleme në të gjithë rajonin, me fluturime të anuluara në aeroporte dhe me mbylljen e shumë bizneseve për shkak të erës së fortë dhe reshjeve të rrëmbyeshme.