Forcat amerikane ndërprenë furnizimet me energji për pistën ajrore të Bagramit dhe nuk njoftuan zyrtarët më të lartë afganë të bazës, kur u larguan të premten, duke shkaktuar habi dhe zemërim mes ushtarëve afganë atje. Komandanti i ri i bazës, gjenerali Mir Asadullah Kohistani, zbuloi që amerikanët ishin larguar vetëm pas më shumë se dy orësh nga largimi i tyre. Detaje të reja të tërheqjes së fshehtë të amerikanëve, gjatë natës, nga baza afër Kabulit, ku ata kishin qëndruar për dy dekada, nënvizojnë problemet me të cilat forcat amerikane shpesh herë i shihnin partnerët e tyre afganë. “Ne dëgjuam disa zëra se amerikanët ishin larguar nga Bagrami... dhe më në fund, në orën 7 të mëngjesit, pamë se ata ishin larguar me të vërtetë”, tha Kohistani për agjencinë e lajmeve Asociated Press. “Ne nuk dinim asgjë për axhendën e largimit të tyre dhe ata nuk na thanë se po largoheshin”, shtoi ai gjatë një turi në bazën tani të evakuuar dhe të plackitur për gazetarët. RRëfimi i tij duket se bie ndesh me një deklaratë të lëshuar javën e kaluar nga shba ku thuhej se forcat amerikane kishin koordinuar largimin e tyre nga baza të ndryshme me liderët afganë. Me vetëm 3 mijë trupa nën komandë, forcat e Kohistanit janë shumë më të vogla krahasuar me praninë ushtarake në bazë më herët. Ndërkohë që tani druhet se forcat afgane të mbetur në Bagram do të sulmohen së shpejti nga talebanët. Vetëm 20 minuta pas largimit të amerikanëve, të premten, energjia elektrike u ndërpre dhe baza u zhyt në errësirë dhe ky ishte një lloj sinjali për plackitësit që hynë nga veri duke rrëzuar barrierat e duke grabitur ndërtesat.