Një person i armatosur vrau gjashtë persona dhe plagosi 28 të tjerë në një universitet në qytetin rus të Permit. Sulmuesi shkoi në kampus të hënën në mëngjes dhe filloi të qëllonte me breshëri. Studentët dhe mësuesit u izoluan brenda ndërtesës së universitetit, ndërsa të tjerët u panë duke ulëritur dhe duke u hedhur nga dritaret. Autoritetet thanë se sulmuesi, një student në universitet, u plagos dhe u ndalua nga policia. Ministria e Brendshme ruse tha se sulmuesi u qëllua gjatë një shkëmbimi zjarri me një oficer policie, i cili ishte një nga të parët që mbërriti në vendin e ngjarjes. Ai çarmatosi sulmuesin, i cili kishte një armë dhe një thikë. Në një deklaratë, Presidenti Vladimir Putin e quajti sulmin "një humbje e madhe jo vetëm për familjet që humbën fëmijët e tyre, por për të gjithë vendin". Incidenti ndodhi në Universitetin Shtetëror të Permit, i vendosur rreth 1,300 kilometra në lindje të Moskës. Një profesor në universitet tha se studentët filluan të hidheshin të tmerruar jashtë ndërtesave. Studentë të tjerë u mbyllën në klasa në një përpjekje për t'i shpëtuar sulmuesit. "Ishim reth 60 persona në klasë. Ne e mbyllëm derën dhe e bllokuam me karrige," tha një student për agjencinë e lajmeve Reuters.