Organizata Botërore e Shëndetësisë ka shprehur shqetësim për numrin në rritje të infeksioneve bakteriale që janë rezistente ndaj ilaçeve, çka komprometon efektin e trajtimeve për shpëtimin e jetës dhe i bën plagët e vogla apo infeksionet e shpeshta, potencialisht vdekjeprurëse. Agjencia e Kombeve të Bashkuara për Shëndetësinë ka paralajmëruar se një në gjashtë infeksione bakteriale të konfirmuara në laborator më 2023, ka treguar rezistencë ndaj trajtimeve me antibiotikë të ndryshëm. “Këto gjetje janë shumë shqetësuese”, tha Yvan J-F. Hutin, kreu i departamentit të OBSH-së për çështje të rezistencës antimikrobiale. “Ndërsa rezistenca ndaj antibiotikëve vazhdon të rritet, ne po na mbarojnë mundësitë e trajtimit dhe po rrezikojmë jetë njerëzish”. Ka vite që disa baktere kanë krijuar rezistencë ndaj ilaçeve të krijuara për t’i luftuar ato, duke i bërë trajtimet krejtësisht të padobishme. Ekspertët besojnë se kjo situatë është rezultat i përdorimit masiv të antibiotikëve te njerëzit, kafshët dhe ushqimet. Bakteret rezistente shkaktojnë rreth 1 milion vdekje në vit dhe kontribuojnë në gati pesë milionë vdekje tjera, sipas të dhënave të OBSH-së. Ky institucion ka arritur në këto përfundime pas analizimit të rezistencës së baktereve në 22 antibiotikë të përdorur për të trajtuar infeksionet e traktit urinar, gastrointestinal, dhe ato të qarkullimit të gjakut.