Presidenti amerikan Donald Trump, sugjeroi se Hamasit i është dhënë drita jeshile për operacionet e sigurisë së brendshme që po kryen në Rripin e Gazës, duke thënë se grupi dëshiron "të ndalojë problemet" dhe "ne i dhamë miratim për një periudhë kohore". Grupi militant palestinez, i cili duhet të çarmatoset dhe t'i japë fund sundimit të tij në Gaza sipas propozimit të Trumpit për fundin e luftës, ka vendosur forca të sigurisë së brendshme në pjesë të Rripit të Gazës që kur një armëpushim hyri në fuqi të premten, duke thënë se synon të ndalojë paligjshmërinë dhe plaçkitjet dhe të parandalojë një boshllëk sigurie. I pyetur nga një gazetar në bordin e Air Force One në lidhje me raportet se Hamasi po e institucionalizonte veten si një forcë policore dhe po qëllonte rivalët, Trump tha se "ata duan të ndalojnë problemet dhe kanë qenë të hapur për këtë dhe ne u dhamë miratim për një periudhë kohore". "Keni afër 2 milionë njerëz që kthehen në ndërtesat që janë shkatërruar dhe shumë gjëra të këqija mund të ndodhin. Pra, ne duam që të jetë një kthim i sigurt. Mendoj se do të jetë mirë por nuk e dimë me siguri", tha Trump. Pjesa më e madhe e Gazës është shndërruar në një gërmadhë gjatë luftës të shkaktuar nga sulmet e Hamasit në Izrael, më 7 tetor 2023. Forcat e sigurisë së Hamasit janë përleshur me anëtarët e një klani në Qytetin e Gazës gjatë dy ditëve të fundit. Ministria e Brendshme e Hamasit lëshoi një deklaratë të dielën duke ofruar një amnisti për njerëzit që tha se ishin bashkuar me bandat e jashtëligjshme përgjegjëse për vjedhjen e ndihmës humanitare dhe plaçkitjen, me kusht që të mos ishin të përfshirë në gjakderdhje. Në një raportim të së hënës, u tha se forcat e Hamasit kanë vrarë 32 pjesëtarë të një bande në qytetin e gazës, në një fushatë sigurie të nisur pas hyrjes në fuqi të armëpushimit. Në operacion po ashtu u arrestuan 24 persona dhe 30 të tjerë t plagosën tha një zyrtar i sigurisë së hamasit. Ai nuk e identifikoi bandën e përfshirë, megjithëse ka disa klane në Gaza të cilat prej kohësh janë parë si rivalë të Hamasit. E ndërsa pengjet izraelite po liroheshin të hënën, hamasi vendosi luftëtarët e tij në Gaza, në një shfaqje të dukshme force. Pamjet tregonin dhjetëra luftëtarë të Hamasit të rreshtuar në një spital në gazën jugore dhe një prej tyre mbante stemën e krahut të armatosur të Hamasit, Brigadave Qassam.