Në samitin historik për paqen në Lindjen e Mesme që u zhvillua në Sharm el-Sheikh të Egjiptit, presidenti amerikan Donald Trump nënshkroi marrëveshjen e armëpushimit për Gazën. Ai u shpreh se duheshin tre mijë vite për këtë marrëveshje. “Na u deshën 3,000 vjet për të ardhur deri këtu, a e besoni?”, tha Trump teksa firmoste dokumentin. Presidenti amerikan shprehu besimin se marrëveshja do të jetë efikase. “Të gjithë janë të lumtur”, deklaroi Trump duke falënderuar të gjithë, për mbështetjen e dhënë gjatë negociatave për armëpushimin ndërsa hodhën firmën edhe presidenti i Egjiptit Abdel Fattah el-Sisi, emiri i Katarit Tamim bin Hamad Al Thani dhe presidenti i Turqisë Recep Tayyip Erdogan. Pakti i nënshkruar synonë të vendosë paqen dhe të ndalë përplasjet në rajon. Trump tregoi se kishte përjetuar “marrëveshje të mëdha më parë”, por kurrë kaq të rëndësishme sa kjo e Gazës. Ai rrëzoi gjithashtu parashikimet për një Luftë të Tretë Botërore në Lindjen e Mesme duke nënvizuar se falë kësaj marrëveshjeje lufta nuk do të ndodhë. Ceremonia e nënshkrimit u përmbyll me duartrokitje nga pjesëmarrësit dhe shpresë për një paqe të qëndrueshme në një rajon prej dekadash të trazuar .Më pas Trump u largua drejt aeroportit ku u nis për në Uashington.