Presidenti amerikan, Donald Trump, i habiti aleatët e NATO-s duke u zotuar të dërgojë 5,000 trupa shtesë në Poloni, vetëm disa orë para se Sekretari amerikan i Shtetit Marco Rubio të takohej me ministrat e aleancës në Suedi, mes përçarjeve të thella mbi luftën e Iranit. Trump, në një postim në Truth Social, përmendi marrëdhënien e tij me presidentin nacionalist konservator të Polonisë, Karol Naërocki, si arsyen e vendimit të tij për të dërguar trupa shtesë. "Bazuar në Zgjedhjen e suksesshme të Presidentit të tanishëm të Polonisë, Karol Naërocki, të cilin isha krenar ta mbështesja, dhe marrëdhënien tonë me të, jam i kënaqur të njoftoj se Shtetet e Bashkuara do të dërgojnë 5,000 trupa shtesë në Poloni", tha Trump në postim. Kjo ishte një kthesë e habitshme pas javësh në të cilat Trump kritikoi ashpër anëtarët e NATO-s për ndihmën e munguar në fushatën ushtarake amerikane në Iran. Ai ka thënë se po shqyrton madje edhe tërheqjen e SHBA-së nga aleanca dhe ka vënë në dyshim faktin nëse Uashingtoni ishte i detyruar të respektonte paktin e tij të mbrojtjes së ndërsjellë.