Pas tre vjetësh merr fund procesi gjyqësor në ngarkim të personave të akuzuar për grabitjen e miliona eurove në Rinas. Në gjykatën e posaçme kundër korrupsionit dhe krimit të organizuar u zhvillua séance në ngarkim të të akuzuarve, në përfundim të së cilës u dhanë dënimet e të pandehurve. Trupa gjykuese dënoi me 20 vite burg Klement Calën dhe me 17 vite vëllain e tij Eldi Çala, të akuzuar për vjedhje në kuadër të grupit të strukturuar kriminal. Gjykata e posaçme kundër korrupsionit dhe krimit të organizuar pushoi cështjen ndaj Admir Muratajt, i cili ishte në krye të kësaj vjedhjeje, për shkak se ai mbeti i vrarë me armë në vendin e ngjarjes. Cështja penale u pushua edhe ndaj Ragip Hajdinit, i cili mbeti i plagosur gjatë vjedhjes së parave, por ndërroi jetë në spital disa muaj më vonë. Masa e sigurisë ndërkohë, vijon të mbetet e njëjtë për të penduarin e drejtësisë Alkond Bengasin, statusi i të cilit pritet të marrë një kthesë tjetër në momentin e dhënies së vendimit përfundimtar për këtë cështje.