Pushtimi i guximshëm i Rusisë nga Ukraina, ka nisur për dy arsye kryesore; ka një qëllim kundrejt Putinit dhe një drejt Perëndimit. Rreth 10,000 trupa ukrainase të mbështetur nga tanke dhe avionë kanë hyrë tani 30 km thellë në Rusi, duke sulmuar rajonet e Kurskut dhe Belgorodit. Automjetet luftarake që mbajnë simbolin e "Trekëndëshit të Bardhë" janë parë të lëvizin përtej kufirit, duke kujtuar skenat kur forcat e Putinit kishin hyrë në drejtimin e kundërt me tanke që mbanin një ‘Z’ të bardhë. Por zyrtarët ukrainas kanë zbuluar tani se cfarë fshihet pas planit të tyre dinak, që ka si qëllim të shtyjë ushtrinë tashmë të lodhur të Putinit drejt pikës së thyerjes. Dhjetra automjete të blinduara kaluan nëpër qytetin ukrainas të Sumy-t, me simbolin e trekëndëshit të bardhë mbi to, ndërsa u nisën për në Rusi. Pas shtyrjes në Kursk në operacionin më të madh ndërkufitar të luftës deri më tani, Rusia u detyrua të pranonte se Ukraina kishte depërtuar thellë deri në 30 km. Dhjetëra e mijëra njerëz janë evakuuar nga zonat kufitare dhe Rusia u detyrua të urdhërojë akoma më shumë evakuime të hënën në mesin e operacionit të paprecedenttë në territorin e saj. Një zyrtar i lartë ukrainas i tha AFP se ideja pas sulmit është që ushtria e Putinit të lodhet sa më shumë që të jetë e mundur, duke u angazhuar në zona të ndryshme. Zyrtari tha në kushte anonimiteti se qëllimi është që të zgjerohet angazhimi i armikut, të shkaktohen humbje maksimale dhe të destabilizohet situata në rusi duke krijuar idenë se vendi nuk është në gjendje të mbrojë kufijtë e tij. Ai tha edhe se pretendimet ruse se kievi kishte angazhuar në këtë operacion 1 mijë trupa, ishin një nënvlerësim serioz. Por, plani i Kievit, ka edhe një tjetër qëllim. Ai synon të japë një mesazh edhe për aleatët në perëndim, që e kanë ndjekur nga afër luftën kundër Putinit. Analistët thonë se operacioni është një sinjal për perëndimin se ukraina është ende e aftë të sulmojë dhe të luftojë. Sipas amerikanes Forbes, në operacion janë përfshirë deri në 10 mijë trupa, të ndarë në pesë brigada, bashkë me një batalion të ndarë prej 400 trupash. Ushtarët e ukrainës po hapin llogore gjatë vijës së re të frontit, duke tentuar të cimentojnë planet për një qëndrim afatgjatë në Kursk. Dhe pushtimi i kurskut, është sulmi më i rëndësishëm i një ushtrie të huaj ndaj rusisë, që nga lufta e dytë botërore.