Mbreti Zog luajti rol kyç në themelimin e shtetit modern, sipas historianit Bernd Fischer. Bernd Fischer, historian - Ai u përball me sfida të panumërta, kishte shumë të meta dhe bëri shumë gabime. Megjithatë, përmes institucioneve që krijoi, hodhi hapat e parë të rëndësishëm në krijimin e shtetit modern. Në prag të 100-vjetorit të themelimit tw monarkisë në Shqipëri, profesori i Historisë në Indiana University dhe një nga studiuesit më të njohur ndërkombëtarë të historisë sonë moderne, sjell për publikun veprën “Mbreti Zog dhe themelet e Shqipërisë moderne”. Studimi ribotohet pas më shumë se tre dekadash me gjetje të reja, falë dokumenteve që Fischer i ka shqyrtuar në arkivat më të mëdha në Europë, me qëllimin për të trajtuar objektivisht figurën e Mbretit Zog. Bernd Fischer, historian - Besoj se një pamje më e qartë dhe e paanshme e Zogut është e vonuar. Shpresoj që ribotimi i këtij libri të mund të kontribuojë në fillimin e këtij procesi, të ndikojë në rivlerësimin e kësaj figure qendrore historike. Vepra u botua në bashkëpunim me Institutin Shqiptar për Studime Ndërkombëtare, që sheh të nevojshëm rishikimin e ngjarjeve historike dhe përballjen me të shkuarën. Albert Rakipi, Instituti Shqiptar për Studime Ndërkombëtare – Fischer me kontributin e tij, ka ndihmuar në bërjen e Shqipërisë. Kjo akademi nuk është për të promovuar librin, ne duam të nxisim një debat për ballafaqimin e shoqërisë shqiptare me të kaluarën. Duam të inkurajojmë shoqërinë shqiptare, jetën akadamikë, profesorë, studiues, të rinj, për t’u ballafaquar me historinë tonë. Ky botim studimor ku përfshihen dhe bisedat që Fischer ka zhvilluar me Mbretëreshën Geraldinë në vitet ‘70, vjen si një kontribut i rëndësishëm në historiografinë e periudhës së monarkisë dhe në vijim.