Kancelari gjerman Friedrich Merz priti këtë të mërkurë në Berlin, presidentin e Ukrainës, Volodymyr Zelensky. Kancelari u shpreh se vendi i tij do të financojë raketat me rreze të gjatë veprimi të prodhuara në Ukrainë, një veprim që do të thotë se Ukraina nuk do të marrë raketën gjermane Taurus. “Nuk do të hyj në detaje këtu, por më lejoni të them se mbështetja ushtarake do të vijojë dhe ne do ta zgjerojmë mbështetjen në mënyrë që Ukraina të mund të vazhdojë të mbrojë veten”, thotë ai. Më tej Merz shtoi: “Do të doja të theksoja diçka të re. Ne do të financojmë një sasi të konsiderueshme të Starlinks dhe ministritë tona të mbrojtjes do të nënshkruajnë një memorandum për raketat me rreze të gjatë veprimi. Nuk do të ketë kufizime në rreze veprimi, kështu që Ukraina mund të mbrohet përtej kufijve të saj.” Nga ana tjetër, Zelensky i bëri dhe një herë thirrje SHBA-së që të vazhdojë të godasë Rusinë me sanksione të ashpra. “Rusia nuk është e gatshme të flasë për një armëpushim, kështu që Kongresi Amerikan duhet të miratojë sanksione. Kur kjo të ndodhë, lufta do të përfundojë më shpejtë. Do të ketë një boshllëk të vërtetë në ushtrinë e Rusisë“, shtoi ai.