I veshur me jelek anti-plumb, piloti grek Babis Anagnostopoulos mbërriti mëngjesin e sotëm në gjykatë. Një grup njerëzish të mbledhur aty pranë e pritën me thirrjet “ Vriteni, të kalbet në burg”, thotë gazeta Protothema, sipas të cilës 32 vjecari do të përpiqet të kërkojë rrethana lehtësuese për krimin e tij, nën pretendimin se e mbyti të shoqen 20 vjecare në kushtet e një “errësimi të gjykimit” për shkak të sherrit të madh që pati me Caroline atë natë. Anagnostopulos pretendon se “u mjegullua” në ato momente dhe humbi kontrollin. Prokurorët këmbëngulin e vrasja e britanikes ishte e paramenduar dhe thonë se piloti duhet dënuar më burgim të përjetshëm. Një prej provave që ata paraqesin për këtë pretendim është fakti se 20 vjecarja ka qenë në gjumë kur i shoqi e mbyti, dhe këtë e tregoi dhe ora smart në dorën e saj. Vetëm pak përpara nisjes së seancës, njëri prej dy avokatëve mbrojtës të pilotit vendosi të japë dorëheqjen nga cështja, duke rrëfyer se kjo bëhët për arsye personale, por pa dhënë shpjegime të mëtejshme. Mbrojtja thotë se Anagnostopoulos nuk do ta kundërshtojë akuzën kryesore, atë që ai është përgjegjës për vdekjen e Caroline, por do të paraqesë të dhëna të reja të papërfshira në dëshminë që dha përpara policisë, të cilat shpreson se do t`ia lehtësojnë situatën duke paraqitur një tablo më të plotë të ngjarjes.