Christopher Hill, ambasadori i parë amerikan në Shqipëri pas rënies së komunizmit, u rikthye në Tiranë, por këtë herë për të sjellë librin e tij “Në shërbim larg vendit”. Libri i ish-diplomatit amerikan, një njohës i mirë i gjithë Ballkanit Perëndimor, i botuar nga UET Press, u prezantua të premten në Universitetin Europian të Tiranës, ku i pranishëm ishte edhe kryeministri Edi Rama. Rama kujtoi kohën kur ambasadori Hill shërbeu në Shqipëri dhe njohjen me të. “Dëgjova për herë të parë për Chris Hill, kur më thanë se kishte çuar Fatos Nanon në burg. Ishte një mënyrë shumë mbresëlënëse për të lënë pas emrin, pasi sapo kishe hyrë në Shqipëri dhe thjesht nuk ishe angazhuar në asnjë reformë, në asnjë transformim, por thjesht kishe çuar në burg dikë dhe ishe larguar”. Teksa foli për rolin e diplomatit Hill në Shqipëri dhe vendet e tjera të rajonit, kryeministri Rama dha një mesazh për të gjithë ambasadorët e Shteteve të Bashkuara të Amerikës në vendin tonë. “Personi më i rëndësishëm në këtë vend për shumë vite ka qenë kushdo që ka qenë ambasador amerikan dhe siç e kam thënë gjithmonë, të jesh ambasador amerikan në Shqipëri, është puna e dytë më e mirë e dikujt që është amerikan pas të qenit president, sepse këtu je perëndi”.