Në “ Ditën e Trashëgimisë Kulturore, Roskoveci u kthye në një skenë të gjallë feste, ku folklori dhe tradita u ringjallën me gjithë hijeshinë e tyre. Në kuadër të projektit “RiFOLK – Rinia promovon folklorin dhe traditën në Roskovec”, i mbështetur nga Ministria e Ekonomisë, Kulturës dhe Inovacionit (MEKI), u organizua një aktivitet unik, që solli para publikut improvizimin e një dasme myzeqare. Sheshi “Memorial” u mbush me tinguj kaba, këngë e valle popullore, ndërsa dhjetëra të rinj e të moshuar u bënë pjesë e festës. Momentet më emocionuese ishin përcjellja e nuses, e shoqëruar me këngë dhe rituale të vjetra, që sollën nostalgji tek të moshuarit dhe kureshtje tek brezi i ri. Ndërkohë pjesëtari i Grupit të Roskovecit, Harilla Goga, pohon se tradita e dasmës duhet trashëguar te brezi i ri, për të mos humbur këtë pasuri të çmuar të trashëgimisë kulturore. “Dasma Roskovecare” synon të kthehet në traditë të përvitshme për të mbajtur gjallë traditat e zonës të trashëguara ndër breza.