Organizata Botërore e Shëndetësisë e këshilloi Ukrainën të shkatërrojë patogjenët që gjenden në laboratorët e shëndetit publik të vendit, nga rreziku se për shkak të bombardimeve, pajisjet në të cilat ato mbahen mund të dëmtohen. OBSH i tha Reuters se ekziston rreziku i përhapjes së sëmundjeve në mesin e popullatës nëse patogjenët "me rrezikshmëri të lartë" nuk shkatërrohen. Zyrtarët e saj nuk dhanë ndërkohë detaje se çfarë lloj patogjenësh apo toksinash mund të jenë brenda laboratorëve të Ukrainës.Ekspertët e biosigurisë këmbëngulin se bombardimi i qyteteve ukrainase dhe lëvizja e trupave ka shtuar ndjeshëm rrëzikun e përhapjes së sëmundjeve nëse dëmtohen laboratorë ku mbahen për arsye studimi mikrobr shkaktare të sëmundjeve të ndryshme. Laboratorët e shëndetit publik të Ukrainës u përfshinë së fundi vec të tjerash edhe në punë kërkimore mbi Covid 19-tën. Rusia ka goditur 18 objekte shëndetësore që nga fillimi i pushtimit në Ukrainë dy javë më pare. Sulmi më i fundit tragjik ishte ai që shkatërroi një maternitet në portin Mariupol. Bombardimi në Mariupol ndodhi në kohën kur mijëra civilë ukrainas po përpiqeshin të largoheshin nga zona e luftimeve. Sulmet ajrore të Moskës nuk po reduktohen pavarësisht përpjekjeve intensive diplomatiek për armëpushim apo shtimit të sanksioneve perëndimore ndaj Rusisë.