Presidenti amerikan Donald Trump thotë se nuk do të ketë tarifa në Ngushticën e Hormuzit, as tani dhe as pas përfundimit të periudhës 60-ditore të negociatave të përcaktuara për bisedime të mëtejshme paqeje. Ai shkroi në rrjetet sociale, duke saktësuar se tarifa do të ketë vetëm nëse ato vendosen nga dhe për Shtetet e Bashkuara të Amerikës, nëse marrëveshja nuk përfundon, për shërbimet e ofruara. Komenti i Trump erdhi pas njoftimit nga Irani se po mbyll Ngushticën e Hormuzit për kalim tregtar në përgjigje të sulmeve të vazhdueshme izraelite në jug të Libanit. Komanda qendrore iraniane njoftoi se vendimi ishte marrë në përgjigje të “mungesës së vullnetit të mirë dhe shkeljes së marrëveshjes nga Shtetet e Bashkuara” në zbatimin e nenit të parë të memorandumit të mirëkuptimit SHBA-Iran, si dhe ndaj “shkeljes së vazhdueshme të armëpushimit në Libanin jugor nga Izraeli”. Duke folur për Fox Njuz, zv/presidenti amerikan, JD Vance, tha se “nuk ka prova” që Irani e ka mbyllur Ngushticën e Hormuzit”. Ndërsa një zëdhënës i Komandës Qendrore të SHBA-së thotë se "qarkullimi nuk është ndërprerë dhe se forcat amerikane "po monitorojnë situatën”. Ministria e Jashtme Pakistanit njoftoi se bisedimet mes palëve në Burgenstock të Zvicrës do të mbahen më 21 qershor, me pjesëmarrjen e përfaqësuesve nga Shtetet e Bashkuara dhe Irani. Bisedimet do të ndërmjetësohen nga Pakistani dhe Katari. Në negociata do të marrë pjesë edhe Kreu i Agjencisë Ndërkombëtare të Energjisë Atomike, Rafael Grossi. Ai ndodhet në Zvicër dhe pritet të drejtojë disa pika të bisedimeve rreth programit bërthamor të Iranit.