Presidenti i Shteteve të Bashkuara të Amerikës, Donald Trump, tha se nuk është ende i kënaqur me kushtet e marrëveshjes që po negociohet me Iranin. Kreu i Shtëpisë së Bardhë deklaroi se Teherani ishte shumë i vendosur për të arritur një marrëveshje për t’i dhënë fund luftës, por shtoi se SHBA-të nuk janë të kënaqur me pretendimet e tyre, duke përsëritur gatishmërinë e Uashingtonit për rifillimin e sulmeve, nëse nuk arrihet dakordësia. Duke folur me gazetarët në një takim të kabinetit të mërkurën, presidenti amerikan tha se "Ata thjesht duan të bëjnë një marrëveshje - nuk mendoj se kanë zgjidhje tjetër. Ata po negociojnë deri në limite. Deri më tani, ne nuk jemi të kënaqur me kushtet e tyre. Por tani ose do të jemi, ose do të duhet thjesht ta përfundojmë punën e nisur”, u shpreh Trump. Komentet e Presidentit amerikan erdhën pasi televizioni shtetëror iranian raportoi për një draft-marrëveshjeje të re, që përfshinte rihapjen e Ngushticës së Hormuzit dhe tërheqjen e forcave amerikane nga rajoni. Shtëpia e Bardhë e quajti deklaratën një "trillim të plotë". "Ky raport nga media e kontrolluar nga Irani nuk është i vërtetë dhe memorandumi i mirëkuptimit që ata 'publikuan' është një trillim i plotë. Askush nuk duhet të besojë atë që po përhap media shtetërore iraniane. Faktet kanë rëndësi", thuhej në reagimin e Shtëpisë së Bardhë. Sekretari Amerikan i Shtetit, Marco Rubio, tha se kishte pasur disa përparime në negociata, duke shtuar se "Do të shohim gjatë orëve dhe ditëve të ardhshme nëse mund të bëhet përparim".