Administrata e presidentit të SHBA-së, Donald Trump, i ndaloi Universitetit të Harvardit pranimin e studentëve të huaj, cka po interpretohet si ndëshkim për faktin që institucioni elitar arsimor nuk ka pranuar t`i nënshtrohet kërkesave të saj. Mijëra studentëve aktualë u kërkohet tani që ose të transferohen në universitete të ndryshme të tjera, ose të largohen krejtësisht nga vendi. “Harvardi nuk mund të regjistrojë më studentë ndërkombëtarë, dhe studentët e huaj ekzistues do ta humbasin statusin e tyre ligjor nëse nuk transferohen”, thuhet në një deklaratë të Departamentit Amerikan të Sigurisë Kombëtare. Njoftimi-bombë erdhi në kohën kur student nga e gjithë bota po përgatiten t`i drtejtohen këtij universiteti, më i vjetri në SHBA dhe një ndër më prestigjozët në vend. Për administratën amerikane, Harvardi ka nxitur një atmosferë të pasigurt në kampus, duke lejuar “anti-amerikanë, pro-terroristë” të sulmojnë studentët hebrenj. Madje, shkohet deri aty sa të pretendohet se drejtuesit e tij kanë bashkëpunuar me Partinë Komuniste Kineze, dhe se kanë ofruar trajnime për anëtarët e një organizate paraushtarake kineze deri në vitin 2024. Universiteti i Harvardit ka rreth 6,800 studentë ndërkombëtarë të regjistruar në kampusin e tij të vendosur në Kembrixh, Massachusetts, që përfaqëson mbi një të katërtën e popullsisë së përgjithshme studentore. Shumica e tyre ndjekin studimet pasuniversitare dhe vijnë nga më shumë se 100 vende të ndryshme. Harvardi e quajti këtë një veprim të paligjshëm dhe hakmarrës, teksa më herët, qeveria federale reduktoi edhe grantet për të me 2.3 miliardë euro, duke e detyruar universitetin të vetëfinancojë një pjesë të konsiderueshme të aktiviteteve të tij të famshme kërkimore.