Presidenti amerikan Donald Trump ka deklaruar se do të shqyrtojë një propozim të ri paqeje nga Irani, por ka shprehur dyshime të forta për pranimin e tij, duke lënë të hapur edhe mundësinë e veprimeve të reja ushtarake. Negociatat mes dy vendeve kanë mbetur të bllokuara që prej armëpushimit të 8 prillit, ndërsa një raund bisedimesh për përfundimin e luftës mbi dy-mujore ka dështuar. Sipas mediave iraniane, Teherani i ka paraqitur një plan me 14 pika ndërmjetësit në Islamabad, që synon ndalimin e konfliktit dhe krijimin e një kuadri të ri për ngushticën strategjike të Hormuzit. Trump u shpreh në rrjetin e tij social se do ta rishikojë planin, por shtoi se “nuk mund të imagjinojë që të jetë i pranueshëm”, duke argumentuar se Irani “nuk ka paguar një çmim të madh për atë që ka bërë ndaj njerëzimit”. I pyetur për mundësinë e një përshkallëzimi të ri, presidenti amerikan nuk dha detaje konkrete, por theksoi se një ndërhyrje ushtarake mbetet opsion: “Nëse sillen keq… është një mundësi që mund të ndodhë”. Nga ana tjetër, zyrtarë të lartë iranianë kanë paralajmëruar se një konflikt i ri është i mundshëm, duke akuzuar SHBA-në për mungesë besueshmërie në marrëveshje. Teherani ka theksuar se është i përgatitur si për diplomaci, ashtu edhe për përballje. Situata mbetet e tensionuar edhe në rajon, me përplasje të vazhdueshme në Liban dhe ndikim të drejtpërdrejtë në tregjet globale, ku çmimet e naftës janë rritur ndjeshëm për shkak të krizës në Hormuz. Në SHBA, debati politik vazhdon mbi ligjshmërinë e veprimeve ushtarake të administratës, ndërsa në Iran pasojat ekonomike po thellohen, me inflacion që ka kaluar 50% dhe presion në rritje mbi popullsinë.