Një raketë ruse goditi një hotel në qytetin qendror ukrainas, Kryvyi Rih, të mërkurën vonë, duke vrarë 4 persona dhe duke plagosur 32 të tjerë, ndërsa ekipet e shpëtimit vazhdonin kërkimet të enjten në mëngjes për ndonjë person të mbetur nën rrënoja. Një grup vullnetarësh nga organizata humanitare, përfshirë nga Ukraina, SHBA-ja dhe Britania, ishin regjistruar në hotel pak para sulmit, por mbijetuan pasi u strehuan shpejt, tha presidenti Volodymyr Zelensky. Kryvyi Rih, qyteti i lindjes së Zelenskiyt, ka qenë një objektiv i shpeshtë që nga fillimi i pushtimit të plotë të Ukrainës nga Rusia tre vjet më parë. “Fatkeqësisht, katër persona u vranë në sulm. Nuk duhet të ndalojmë presionin mbi Rusinë për të ndaluar këtë luftë dhe terrorin kundër jetës,” shkroi presidenti në Telegram. Shërbimet e Emergjencës të Ukrainës thanë se 19 persona ishin shpëtuar nga zona e hotelit. Ata postuan fotografi të ekipeve të shpëtimit duke kaluar mes rrënojave jashtë ndërtesës pesëkatëshe të ndriçuar me prozhektorë dhe duke u ngjitur lart e poshtë shkallëve. Fotografitë e postuara nga guvernatori rajonal treguan hotelin të enjten me katin e sipërm të shkatërruar dhe pjesën tjetër të ndërtesës të dëmtuar rëndë. Ai tha se 2 fëmijë ishin mes të plagosurve. Në një zhvillim tjetër, ushtria ukrainase tha se forcat ruse kishin lëshuar gjithsej dy raketa balistike – përfshirë atë që goditi Kryvyi Rih – dhe 112 dronë kundër Ukrainës gjatë natës. Në qytetin verilindor Sumy, dronët rusë goditën një depo postare dhe shkaktuan një zjarr të madh, duke vrarë një person dhe duke djegur tërësisht objektin së bashku me më shumë se 2,500 pako. Fotografitë dhe videot e postuara nga Nova Poshta, kompania pronare e depos, treguan mbetjet e djegura të magazinës të mbushura me rrënoja dhe pako të shkatërruara nga zjarri.